سياسة الخصوصية

آخر تحديث: 23 أكتوبر 2026

أرباح (الموقع arbah.app وتطبيق أرباح) منصة للمحلات والأنشطة التجارية في مملكة البحرين: متجر إلكتروني، ونقطة بيع، وحسابات، وأنظمة تشغيل. هذي السياسة توضّح البيانات اللي نجمعها، وليش، وشنو خياراتك. تشمل الموقع وتطبيقات أرباح على أندرويد و iOS.

البيانات اللي نجمعها

حسابات التجار والموظفين: الاسم، والإيميل، ورقم الجوال، وكلمة المرور (تنحفظ مشفّرة بس)، واسم النشاط وإعداداته.
بيانات النشاط اللي تدخلها: المنتجات والأسعار والمخزون والطلبات والمبيعات والفواتير والمصاريف والموظفين وزباين محلك.
زباين المتاجر: لما أحد يطلب من متجر تاجر أو يحجز موعد: الاسم والجوال وعنوان التوصيل وتفاصيل الطلب. التاجر هو صاحب هذي البيانات، واحنا نعالجها نيابة عنه.
الأجهزة: رمز الإشعارات ونوع الجهاز ونسخة التطبيق، عشان نرسل إشعارات الطلبات للتطبيق.
بيانات تقنية: عنوان IP ونوع المتصفح أو الجهاز والسجلات اللازمة لتشغيل الخدمة وحمايتها. الكوكيز نستخدمها بس عشان يبقى دخولك ونتذكّر لغتك.

ما نجمع أرقام البطاقات. الدفع بالبطاقة يصير في صفحة الدفع الآمنة عند مزوّد الدفع (Tap Payments)، وهو اللي يتعامل مع بيانات البطاقة حسب سياسته.

ليش نستخدم البيانات

لتشغيل حسابك ومتجرك ونقطة البيع والأنظمة، وعرض تقاريرك.
لإرسال إشعارات الطلبات والحجوزات والفواتير، وإيميلات الخدمة (التأكيد، وتغيير كلمة المرور، والفواتير).
لترتيب التوصيل لما يطلبه التاجر.
لحماية الخدمة ومنع إساءة الاستخدام والالتزام بالقانون.

ما نبيع البيانات الشخصية وما نستخدمها للإعلانات.

مع منو نشاركها

Tap Payments — لاستلام الدفع بالبطاقة ودفع اشتراكات أرباح.
سايق (التوصيل) — اسم الزبون وجواله وعنوانه، بس لما التاجر يطلب توصيل.
Google Firebase Cloud Messaging — لتوصيل إشعارات التطبيق (رمز الجهاز ونص الإشعار).
مزوّدي الاستضافة والإيميل اللي يشغّلون سيرفراتنا ويرسلون إيميلاتنا.
الجهات الرسمية لما يطلب القانون.

مدة الحفظ والحذف

نحفظ البيانات طول ما حسابك شغال. تقدر تحذف حسابك في أي وقت من التطبيق (الإعدادات ← حذف الحساب) أو من الموقع — شوف حذف الحساب. لما صاحب المتجر يحذف الحساب، يتقفل المتجر واللوحة وتنشال كل حسابات الدخول للنشاط على طول. سجلات المبيعات والفواتير والضريبة تنحفظ بس للمدة اللي يطلبها القانون، بدون أي طريقة للدخول عليها، وبعدها تنحذف.

حقوقك

حسب قانون حماية البيانات الشخصية في البحرين (القانون رقم 30 لسنة 2018) تقدر تطلب تشوف بياناتك أو تصححها أو تحذفها. زباين المتاجر يتواصلون مع التاجر اللي طلبوا منه، واحنا نساعد التاجر يرد عليهم.

الحماية

الاتصال مشفّر (HTTPS)، وكلمات المرور مشفّرة، ومفاتيح الدفع تنحفظ مشفّرة. الوصول للبيانات محصور باللي يحتاجه تشغيل الخدمة.

الأطفال

أرباح خدمة للأنشطة التجارية، ومو موجهة للي أعمارهم تحت 18 سنة.

التغييرات والتواصل

أي تغيير على هذي السياسة ننشره في هذي الصفحة. للأسئلة: info@arbah.app.